Bible

1 願你像吾親兄弟，食過吾姆个乳；恁樣，𠊎在街項堵到你个時，㧯你唚嘴，就無人會看輕𠊎。 2 𠊎愛𢱋你入吾姆个屋下，俾你來教𠊎愛樣般惜你。𠊎愛給你啉𠊎石榴做个酒，這個酒係有摻香料去做个。 3 佢用左手托等𠊎个頭那，用右手揇等𠊎。 4 耶路撒冷个細妹仔啊，請答應𠊎，莫吵𠊎等，毋好㩢耍𠊎等，俾𠊎等个愛情自由發展。 5 該憑等姖个情郎，對曠野上來个人係麼人呢？在蘋果樹下，𠊎將你喊醒。在該位，若姆將你𫱔出來，若姆為到𫱔你忍受痛苦。 6 求你將𠊎像印仔掛在若胸前，像禁指印仔戴在若手指項。愛情就像死恁堅強；戀情像陰間恁堅固。它所爆出來个火花，就像烈火恁樣盡燒。 7 水潑毋烏个愛情，大水也無法浸掉。若用全部家產換愛情，這人一定會被人藐視。 8 𠊎等屋下有個老妹，姖个乳菇還吂發育。後生人來提親該日，𠊎等愛樣般正好呢？ 9 姖若係圍牆，𠊎等愛在圍牆頂起銀塔；姖若係一扇門，𠊎等愛用香柏樹枋來圍等姖。 10 𠊎就係圍牆，𠊎个乳菇像頂高个高塔。𠊎个情郎知，𠊎會帶來美滿幸福。 11 所羅門在巴力‧哈們有一垤葡萄園，佢將這葡萄園租給耕種人；該兜人逐儕愛納一千隻銀幣。 12 所羅門哪，一千隻銀幣歸給你，兩百隻銀幣歸給耕種个人；總係𠊎得到𠊎自家个葡萄園！ 13 𠊎个情妹，你住在園中，朋友全部聽你講話，求你使𠊎也聽得到你个聲。 14 𠊎个情郎，遽遽來啊，像一隻羚羊，像一隻細鹿仔，在香草山頂。